Political News

కోడెల నియోజకవర్గానికి వంగవీటి రాధా?.. చంద్రబాబు కీలక నిర్ణయం!.

వంగవీటి రాధాకృష్ణ.. ఏపీ రాజకీయాల్లో పరిచయం అక్కరలేని పేరు.. మొన్నటి వరకు రాజకీయాలకు కాస్త దూరంగా ఉంటున్న వంగవీటి వారసుడు.. మళ్లీ టీడీపీలో యాక్టివ్ కాబోతున్నారా.. అధినేత చంద్రబాబు రాధాకు కీలక పదవి అప్పగించేందుకు సిద్ధమయ్యారా.. ఓ కీలక నియోజకవర్గానాకి సంబందించిన బాధ్యతలు అప్పగించబోతున్నారా.. అవును నిజమేనంటున్నాయి టీడీపీ వర్గాలు. సోషల్ మీడియాలో కొత్త చర్చ మొదలైంది.. వంగవీటి రాధాకు టీడీపీలో కీలకమైన బాధ్యతలు అప్పగించబోతున్నారనే ప్రచారం జరుగుతోంది.

వంగవీటిని గుంటూరు జిల్లా సత్తెనపల్లికి టీడీపీ ఇంచార్జ్‌గా నియమించబోతున్నారనే సోషల్ మీడియాలో జోరుగా ప్రచారం జరుగుతోంది. అధినేత చంద్రబాబు పార్టీ నేతలతో ఇప్పటికే చర్చించారని.. వంగవీటి రాధా పేరు దాదాపు ఖరారు చేశారనే టాక్ వినిపిస్తోంది. సోషల్ మీడియాలో కొందరు తెలుగు తమ్ముళ్లు, పార్టీ సానుభూతి పరులు పోస్టుల్ని వైరల్ చేస్తున్నారు. త్వరలోనే పదవికి సంబంధించి అధికారికంగా ప్రకటన వచ్చే అవకాశం ఉందంటున్నారు. స్థానిక సంస్థల ఎన్నికలు రాబోతుండటంతో చంద్రబాబు ఈ నిర్ణయం తీసుకున్నారనే ఊహాగానాలు వినిపిస్తున్నాయి.

వాస్తవానికి సత్తెనపల్లి నియోజకవర్గానికి ఇంఛార్జ్ ఎవరూ లేరు. మాజీ స్పీకర్ ఈ సత్తెనపల్లి బాధ్యతల్ని చూసుకుంటున్నారు.. కానీ ఆయన మరణం తర్వాత పరిస్థితి మారిపోయింది. అక్కడి కేడర్ మొత్తం గందరగోళంలో ఉంది. నియోజకవర్గ టీడీపీ ఇంచార్జ్ ఎవరు అనేది కార్యకర్తల్లో కొంత కాలం నుండి సందిగ్ధంగా మారింది. దీనికి చెక్ పెట్టేందుకు అధిష్టానం కసరత్తు చేసిందని.. కోడెల తర్వాత అంతటి ప్రాముఖ్యత చరిష్మా గల నాయకుడు ఎవరని చర్చించి. వంగవీటి రాధను తీసుకొస్తే ఎలా ఉంటుందని చర్చించి.. ఈ నిర్ణయం తీసుకున్నట్లు సత్తెనపల్లిలో కూడా గుసగుసలు వినిపిస్తున్నాయి.

వంగవీటి రాధాను సత్తెనపల్లి నియోజకవర్గానికి పంపించడం వెనుక సామాజిక సమీకరణాలు లేకపోలేదంటున్నారు. ఈ నియోజకవర్గంలో 30 వేల వరకు కాపు సామాజిక వర్గం ఓట్లు ఉన్నాయట.. అందుకే రాధాను అక్కడికి పంపిస్తే బావుంటుందనే అభిప్రాయాలు వినిపించాయట. ఇది కూడా ఓ కారణంగా చెబుతున్నారు. స్థానిక సంస్థల ఎన్నికలు ఉన్నాయి కాబట్టి.. మరో రెండు మూడు రోజుల్లో ఆయన పేరును ప్రకటిస్తారనే చర్చ నడుస్తోంది. ఇటీవల గుడివాడ, బాపట్ల, ఏలూరు, మాచర్ల నియోజకవర్గాలకు ఇంఛార్జ్‌లను నియమించారు. ఇప్పుడు సత్తెనపల్లి వంతు వచ్చిందంటున్నారు.

వంగవీటి రాధా సంగతి పక్కన పెడితే మరి సత్తెనపల్లిపై ఆశలు పెట్టుకున్న రాయపాటి రంగబాబు, కోడెల కుమారుడు శివరామ్ పరిస్థితి ఏంటనే ప్రశ్నలు వినిపిస్తున్నాయి. ఈ ఇద్దరు నేతలు కూడా నియోజకవర్గ ఇంఛార్జ్ పదవి రేసులో ఉన్నారు. కోడెల శివప్రసాదరావు ఉన్నప్పుడే రాయపాటి రంగబాబు దూకుడు ప్రదర్శించారు. నియోజకవర్గంలో సమావేశాలు పెట్టడం హాట్‌టాపిక్ అయ్యింది. తర్వాత కోడెల చనిపోవడంతో రంగబాబు నియోజకవర్గ బాధ్యతలు దక్కుతాయని భావించారు. కానీ చంద్రబాబు మాత్రం ఎవరి పేరు ప్రకటించలేదు.

వంగవీటి రాధా ఎన్నికలకు ముందు వైఎస్సార్‌సీపీకి రాజీనామా చేశారు. చంద్రబాబు సమక్షంలో టీడీపీలో చేరారు.. పార్టీ అభ్యర్థుల విజయం కోసం ప్రచారం చేశారు. ఎన్నికల్లో టీడీపీ ఓటమి తర్వాత రాజకీయాలకు దూరంగా ఉంటున్నారు.. తర్వాత ఐదారు నెలలకు జనసేన అధినేత పవన్ కళ్యాణ్‌ను కలవడంతో ఆ పార్టీలోకి వెళతారని ప్రచారం జరిగింది. తర్వాత కొద్దిరోజులకు చంద్రబాబు ఇంటికి వెళ్లడం ఆసక్తికరంగా మారింది.. మళ్లీ ఇప్పుడు ఆయన అమరావతి ఉద్యమంలో చురుగ్గా పాల్గొంటున్నారు. టీడీపీ కార్యక్రమాలకు మాత్రం దూరంగా ఉంటున్నారు.

 Political News
Hariyan Srinivas
  Political News
Mar 04, 2020
  Political News
Political News